den Aire Oideachais an bhfuil sé ar eolas aige gur mian le tuismitheoirí go mbeadh caoi ag a bpáistí le ceol Gaelach, rincí Gaelacha agus ár gcultúr go hiomlán a chur os comhair a gclainne sa chóras oideachais, agus an inseoidh sé cén treoir atá dhá tabhairt aige leis an ghné seo dár ndúchas a thabhairt slán.

Tá a fhios agam go maith go bhfuil spéis ag a lán de na tuismitheoirí sa cheol agus sa Rince Gaelach, agus gur mian leo nach gceilfí ár gcultúr dúchasach ar a bpáistí. Tá mé lán-taobhach leis an dearcadh sin, agus creidim go bhfuil múinteoirí na tíre taobhach leis chomh maith.

Tugtar aire mhaith do na cúrsaí seo sna treoracha do mhúinteoirí atá ar fáil ins an leabhar ‘Curaclam na Bunscoile' agus do na slite inar féidir an dá ábhar Ceol agus Rince a cheangailt le téamaí bunaithe ar ár dteanga, ar ár mbéaloideas agus ar ár stair.

Mar is eol don Teachta téann na scoláirí ó na Coláistí Oideachais go dtí an Ghaeltacht mar chuid dá gcúrsa léinn le taithí breise a fháil ar an gcultúr Gaelach — an Ceol agus an Rince Gaelach ina measc.

Ag an dara leibhéal tá gnéithe de chultúr na tíre fite fuaite in a lán de na hábhair atá ar chlár na scoileanna. Tugtar treoir faoi na gnéithe sin den chultúr a chur os comhair na ndaltaí le linn dóibh a bheith ag gabháil d'ábhair mar an Ghaeilge féin, an Stair, an Tíreolaíocht, an Ceol, an Corpoideachas agus an Ealáin.

Tá socraithe agam a iarraidh ar an mBord Curaclaim agus Scrúdaithe, nuair a bheidh sé bunaithe go foirmiúil, féachaint le cúrsa sa tSaíocht Éireannach (Irish Studies) a thabhairt isteach i gcuraclam na scoileanna mar thacaíocht don Ghaeilge. Bheadh an oidhreacht chultúrtha ag croílár a leithéid de chúrsa.

Maidir leis an gceol féin tá sé mar chúram ar Bhrainse Foilseacháin na Roinne (An Gúm) ceol dúchais na hÉireann a fhoilsiú agus foilsíodh ceithre shaothar dá leithéid i gcaitheamh na bliana seo caite.