den Taoiseach an féidir leis a rá cén méid atá imithe ar imirce ó gach Ceantar Gaeltachta le trí bliana anuas agus an bhfuil tacaíocht nó comhairle ar bith á tabhairt ag Roinn na Gaeltachta chun go mbeifí in ann oibriú go dleathach thar lear; agus an ndéanfaidh sé ráiteas faoi.

Tuigim ón bPríomhoifig Staidrimh nach bhfuil staitisticí den chineál sin ar fáil. Ní thugann Roinn na Gaeltachta comhairle den chineál atá i gceist ag an Teachta toisc nach cuid dá cúram í.

Tá a fhios ag an Aire Stáit go bhfuil na mílte den aos óg ag tréigean na tíre faoi láthair agus iad ag imeacht go Sasana agus go Meiriceá. An bhfuil sé ar intinn ag an Aire Stáit bualadh le polaiteoirí sna Stáit Aontaithe agus le comhaltaí de na heagrais a bhfuil suim acu san aos óg atá go mídhleathach sna Stáit Aontaithe faoiláthair leis an cheist sin a phlé?

Mar a dúirt mé, ní bhaineann sé sin go hoifigiúil le Roinn na Gaeltachta. Tá a fhios agam go bhfuil suim ag an Roinn Ghnóthaí Eachtracha agus ag cuid de na hAirí Stáit sna cúrsaí seo agus go bhfuil siad sásta gach cabhair is féidir a thabhairt do na daoine seo atá i Meiriceá i láthair na huaire.

Tá a fhios ag an Aire Stáit freisin go bhfuil neart de aos óg na Gaeltachta, go hiondúil, imithe go Sasana, agus an bhfuil sé ar intinn aige cabhair ar bith a thabhairt ó Roinn na Gaeltachta do na hIonaid Éireannacha atá i Londain agus i Manchester?

Mar a dúirt mé sa fhreagra, ní thagann na cúraimí sin go díreach faoi Roinn na Gaeltachta, ach fad is a bhaineann sé liom go pearsanta tá teagmháil agam le daoine atá i Sasana agus ba maith liom go gcuideodh an Rialtas leo gach bealach is féidir leo, ach ní trí Roinn na Gaeltachta ach trí an Roinn Ghnóthaí Eachtracha.