den Taoiseach céard é polasaí an Rialtais i leith na Gaeilge mar theanga labhartha; agus cén tacaíocht atá ar fáil ón Rialtas i mbliana i dtreo is nach laghdófar mar theanga labhartha as seo amach í.

Is cuspóir náisiúnta é an Ghaeilge a athbheochan agus tá tacaíocht leanúnach tugtha don aidhm sin ag Rialtais éagsúla thar na blianta. Go príomha tá feidhm á tabhairt don pholasaí sin sna hAchtanna faoinar bunaíodh Roinn na Gaeltachta, Bord na Gaeilge agus Údarás na Gaeltachta (a bhfuil tagairt iontu go léir don teanga mar mheán cumarsáide) agus sa bhéim a leagtar ar mhúineadh na Gaeilge sna scoileanna.

Léiríonn Leabhar na Meastachán an cúnamh atá á chur ar fáil ag an Rialtas trí Roinn na Gaeltacha i mbliana agus ar ndóigh baineann cuid suntasach de chaiteachas na Roinne Oideachais le múineadh na Gaeilge. Ina theannta sin tá cúnamh fial á chur ar fáil ag an Rialtas ó fháltais an chrannchuir náisiúnta don Ghaeilge.

Ní airgead amháin a theastaíonn ón Ghaeilge as seo amach. Céard í tuairim an Aire Stáit faoin bhrú atá ar fud na tíre i láthair faoin Ghaeilge mar ábhar san ardteistiméireacht agus mar theanga labhartha? An bhfuil sé ar intinn ag an Rialtas athrú ar bith sa mheon sin a thabhairt timpeall? Tá an-bhrú taobh amuigh den Ghaeltacht faoi láthair i leith na Gaeilge mar theanga labhartha.

Ní dóigh liom go bhfuil muintir an taobh seo den Tí i gcoinne béim a leagan ar an Ghaeilge sna meánscoileanna. Sílim go bhfuil sé tábhachtach go leanfaí ar aghaidh leis an Ghaeilge a choinneáil chomh láidir agus is féidir. Baineann sé sin leis an Roinn Oideachais, ar ndóigh, ach ní fheicim go bhfuil aon pholasaí athruithe ansin maidir le ceist na Gaeilge. Is é an rud is mó a theastaíonn ná na gnáthdhaoine taobh amuigh den Ghaeltacht a spreagadh le níos mó úsáid a bhaint as an Ghaeilge agus tá sé sin leagtha síos mar pholasaí againne. Tá airgead curtha ar fáil as an chrannchur náisiúnta chun an spreagadh sin a chur ar aghaidh.

An bhfuil an tAire Stáit ag rá go ndéanfaidh an Rialtas gach iarracht as seo amach chun an Ghaeilge a chaomhnú agus a threisiú thart faoin tír. B'fhéidir go dtiocfadh an Taoiseach féin isteach anseo lá éigin agus ráiteas a chur amach as Gaeilge i dtreo is go dtabharfaí cinnireacht sa cheist seo.

Tá sé sin déanta cheana ag an Taoiseach nuair a labhair sé ag Ard Fheis Fhianna Fáil. D'iarr sé ar bhaill an pháirtí iad féin tosnú agus an dea-shampla a thabhairt maidir le labhairt na Gaeilge. Sílim má ghlacann muintir na tíre uilig leis an chinnireacht sin go mbeidh feabhas mór ar chúrsaí.