An aontódh an tAire Stáit leo siúd atá den tuairim g bhfuil laghdú ar chaighdeán múinteoireachta trí Ghaeilge agus dá bhrí sin go bhfuil gá le neartú eigin ó thaobh scoileanna le haghaidh múinteoirí, ionas go mbeadh a dhóthain múinteoirí óga ag teacht amach sna scoileanna náisiúnta go háithrid a bheadh ábalta an Ghaeilge a mhúineadh i gceart agus a bheadh líofa iad féin sa Ghaeilge.

Tá scoileanna lán-Ghaelacha ag teacht chun cinn thart faoin tír ar fad, agus fiú amháin anseo imBaile Átha Cliath tá go leor díobh ann. Is cinnte mar sin go bhfuil suim an-mhór ag tuismitheoirí i ndul chun cinn na Gaeilge. Maidir le múineadh na Gaeilge sna scoileanna, is dócha gur fíor a rá gur tháinig laghdú beag nuair a cuireadh deireadh leis na coláistí ullmhúcháin; ní raibh oiread daoine a tháinig isteach go dtí na coláistí oiliúna go raibh an cumas Gaeilge céanna acu agus a bhí ag na daoine a tháinig isteach ó na coláistí ullmhúcháin. Bíonn an argóint sin ann i gcónaí, nach bhfuil múineadh na Gaeilge chomh maith sna scoileanna anois ó rinneadh an t-athrú sin. San am céanna, ní thagann múinteoirí ar bith amach as na coláistí oiliúna nach bhfuil oilte go leor le Gaeilge a mhúineadh in ár scoileanna. Dá bhrí sin táimid sásta go bhfuil siad in ann an caighdeán a choinneáil suas sna scoileanna.