Tá sé ráite le seachtain anuas i gcuid mhaith de na meáin chumarsáide go bhfuil an Rialtas chun reachtaíocht a thabhairt chun cinn chun cumhacht níos leithne a thabhairt do na bainc agus institiúidí morgáistí tithe a thógáil ó theaghlaigh atá i dtrioblóid le aisíoc morgaístí. Mar is eol don Taoiseach, chuir an tArd Chúirt cosc ar na bainc daoine a dhíbirt as a dtithe má tógadh na cásanna cúirte i ndiaidh 1 Nollaig 2009.

An bhfuil an reachtaíocht seo le tabhairt chun cinn? An bhfuil sé seo i gceist mar réiteach ar an gcruachás ina bhfuil gnáthdhaoine de bharr polasaithe tubaisteacha déine an Rialtais? An bhfuil an Rialtas chun reachtaíocht den tsaghas seo a thabhairt chun cinn, seachas na fiacha agus na aisíocaíochtaí a laghdú, chun cumhacht a thabhairt do na bainc daoine a chaitheamh amach as a dtithe? An bhfuil sé fíor go bhfuil an reachtaíocht seo ag teacht?

Caithfear déileáil leis an gceist seo ag éirí as an mbreithiúnas Ard Chúirte le blianta anuas. Tá sé i gceist againn reachtaíocht a thabhairt isteach chun an córas dlíthiúil atá anseo - an Dunne judgment - a réiteach. Foilseofar an Bille sin sa seisiún seo. Ní rud nua é seo. Nuair a bhí mé mar chomhairleoir ar údarás áitiúil na blianta fada ó shin, i mbeagán cásanna nuair nach raibh aon iarracht á dhéanamh an t-airgead a íoc thar n-ais, tógadh an teach ón duine agus bhí teach eile le tabhairt dóibh. Ní miste liom go mbainfí teach as duine ar bith. Caithfear an dlí a réiteach de réir an bhreithiúnais Ard Chúirte. Tá sé ráite ag na bainc nár mhiste leo teach ar bith a thógáil as duine ar bith. Tá sé i gceist againn go mbeidh an próiseas soiléir agus féaráilte. Ní cheart go mbeadh banc ar bith in ann teacht anuas an bóthar agus a rá "táimid chun an teach seo a thógáil uait" gan próiseas soiléir agus féaráilte a leanúint. Caithfidh an Rialtas glacadh leis an mbreithiúnas Ard Chúirte ina leith seo. Foilseofar an Bille sin go luath.