I rith na Dála deireanaí, d'fhoilsigh an tAire Ealaíon, Oidhreachta agus Gaeltachta Bille leasaithe ar Acht na dTeangacha Oifigiúla agus cuireadh i gcoiste é. Ní raibh mórán glactha ag an gcoiste leis an mBille a bhí foilsithe ag an am sin. Tá ceist an-simplí agam ar an Taoiseach. An bhfuil sé i gceist ag an Aire cinn Billí nua a fhoilsiú agus iad a chur ar ais ag an gcoiste nó an bhfuil sé i gceist aici dul ar aghaidh agus an Bille leasaithe a fhoilsiú mar Bhille? Cé acu a bheidh ann: cinn Billí leasaithe nó Bille bunaithe ar an rud a bhí curtha faoi bhráid an choiste cheana?

Ní raibh an tAire in ann an Bille deireanach a chur tríd an Teach mar ní raibh aontas ar bith ann faoi. Tá sé ar intinn ag an Aire Bille nua a thabhairt isteach. Tá sí ag obair air sin faoi láthair. Níl a fhios agam go cruinn an bhfuil sí ag obair ar na forálacha a bhí sa seanBhille, ach cuirfidh mé scéal chuig an Teachta Ó Cuív maidir leis.