Inné, d'fhoilsigh an Taoiseach an clár reachtaíochta don téarma seo sa Dáil. Ní fheicim aon tagairt ar chor ar bith ann do Bhille nua na dteangacha oifigiúla. Cathain a fhoilseofar an Bille seo? Ná déanaimís dearmad gur gheall an Taoiseach sa téarma deireanach go mbeadh sé foilsithe faoin mbomaite seo. Sheas sé san áit ina bhfuil sé anois an bhliain seo caite agus dúirt sé go mbeadh an Bille seo foilsithe roimh dheireadh na bliana. Níl sé foilsithe fós. Bhris an Taoiseach an gealltanas sin. Iarraim air a bheith ionraic leis an bpobal agus insint dúinn cathain a bheidh an Bille seo foilsithe.

Nílim ag briseadh gealltanais ar chor ar bith. Ní raibh aontas idir na polaiteoirí faoin mBille a bhí foilsithe. Is éard atá i gceist anois ná go bhfuil oifigigh nua tofa agus tá siad ag obair ar Bhille nua. Rachaidh sé trí choiste na Gaeilge ionas go mbeidh aontas ann idir na polaiteoirí faoi.