I call Deputy Catherine Connolly.

Ní mór dom a rá, a Leas-Cheann Comhairle, go bhfuil sé deacair cloí leis na rialacha ó thaobh ama de nuair a ligtear don Taoiseach agus do cheannaire Pháirtí Fhianna Fáil dul thar am i gcónaí. Maidir le Bille na dteangacha-----

Bhí mé ag iarraidh srian a chur orthu. Dúradh nach raibh mé ag tabhairt go leor ama dóibh.

Tuigim go ndearna an Leas-Cheann Comhairle a dhícheall ach, d'ainneoin sin-----

Níl sé furasta.

Níl sé furasta ach b'shin post an Leas-Cheann Comhairle.

Maidir le Bille na dteangacha oifigiúla, thug an Taoiseach geallúint shollúnta an bhliain seo caite go mbeidh sé foilsithe roimh an Nollaig. Thug sé geallúint eile i mí Lúnasa go mbeidh sé foilsithe roimh an samhradh agus geallúint eile fós go mbeidh sé foilsithe roimh an Nollaig seo. An mbeidh sé ag comhlíonadh a chuid dualgas agus geallúintí maidir le Bille na dteangacha oifigiúla agus an mbeidh sé foilsithe an tseachtain seo nó cén dáta a foilseofar é?

Bainfimid triail amárach chun 30 soicind a thabhairt do gach duine agus b'fhéidir-----

Ní ceart an milleán a chur orainn. Níor sháraigh mise an t-am riamh ach sháraigh an Taoiseach agus ceannaire Pháirtí Fhianna Fáil é.

Fág agamsa é, a Theachta. Glaoim anois ar an Taoiseach labhairt.

Maidir le Bille na dteangacha oifigiúla, leagadh é faoi bhráid an Rialtais maidin inniu. Tá áthas orm gur tugadh cead é a fhoilsiú agus tús a chur leis an bpróiseas reachtaíochta san Oireachtas. Is céim mhór chun tosaigh í seo.

Cinnteoidh an Bille nua go leanfaidh Acht na dTeangacha Oifigiúla de bheith ina thacaíocht do gach duine ar mhian léi nó leis seirbhísí d'ardchaighdeáin i nGaeilge a fháil ón Stát.

Creidim féin agus creideann an Rialtas go ndéanfaidh an reachtaíocht difríocht mhór don Ghaeilge agus do shaol na Gaeilge sa tír seo. Gabhaim buíochas leis an Aire Stáit, an Teachta Kyne, agus don Roinn as an obair atá déanta acu air seo.