336. D'fhiafraigh Deputy Aengus Ó Snodaigh den Aire Oideachais agus Óige ós rud é go ndúirt oifigigh sa Roinn Oideachais, le linn an Plean Gnímh don Ghaeilge i Scoileanna Meán-Bhéarla a chur le chéile, go gcuirfear beartas amháin le chéile chun an Polasaí don Oideachas Gaeltachta, an Plean Gnímh don Ghaeilge i Scoileanna Meán-Bhéarla agus don Pholasaí don Oideachas Lán-Ghaeilge lasmuigh den Ghaeltacht a chuimsiú, an féidir leis an Aire staid reatha fhorbairt an pholasaí chuimsithigh sin a chur in iúl [48970/26]

Tá cur chuige céimniúil, seicheamhach á leanúint ag mo roinn maidir le forbairt bheartais don Ghaeilge sa chóras oideachais. Maidir le cúraim mo roinne, tá trí shnáithe leis an obair seo: an Polasaí don Oideachas Gaeltachta; an Polasaí don Oideachas Lán-Ghaeilge lasmuigh den Ghaeltacht agus an Plean Gnímh don Ghaeilge i Scoileanna Meán-Bhéarla. Le chéile, is céimeanna tábhachtacha iad na polasaithe agus na tionscnaimh seo i dtreo polasaí cuimsitheach don Ghaeilge sa chóras oideachais a sholáthar.

I gcomhthreo leis an obair atá ar bun ag mo roinn, tá Plean Náisiúnta do Sholáthar na Gaeilge i bhFoghlaim agus Cúram na Luath-Óige agus i gCúram Leanaí d’Aois Scoile á fhorbairt ag mo chomhghleacaí, an tAire Leanaí, Míchumais agus Comhionannais. Tá ár ranna ag obair go dlúth le chéile chun a chinntiú go bhfuil na polasaithe ailínithe lena chéile.

Foilsíodh an Plean Gnímh don Ghaeilge i Scoileanna Meán-Bhéarla agus an Polasaí don Oideachas Lán-Ghaeilge lasmuigh den Ghaeltacht i mí na Samhna 2025 agus tá na céimeanna tosaigh tógtha maidir leis na polasaithe a chur chun feidhme.

A luaithe is atá dul chun cinn breise déanta maidir le cur chun feidhme na bpolasaithe sin, agus nuair a bheidh fianaise ar fáil ó athbhreithniú ar a gcur chun feidhme, déanfar machnamh ar na chéad chéimeanna eile maidir le beartas oideachais don Ghaeilge. Léireoidh sé, agus déanfaidh sé forbairt ar, na naisc idir na trí pholasaí a bhaineann leis na hearnálacha Gaeltachta, lán-Ghaeilge agus meán-Bhéarla, chomh maith le polasaithe ábhartha eile. Cuirfear san áireamh ann freisin aiseolas ó chur chun feidhme an bheartais reatha, torthaí taighde, athbhreithniú ar chleachtas i ndlínsí eile, agus comhairliúchán le páirtithe leasmhara oideachais agus Gaeilge.